فضفضة مغتربة "الحلقة الثانية"

“أمنا الغوله”
تنويه!!! تحتوي هذه الحلقة على مشاهد مرعبه يرجى الحذر و إطفاء الجهاز في حال وجود أطفال!!!

ما بعرف ليه اليوم حسيت حالي شفت (( امنا الغولة )) الحقيقية!!!! متزكرينها؟؟؟ كانت بفيلم اسمه العفاريت ! صورتها ما راحت من بالي.. لهلأ بتزكر هادا الفيلم كان عامل صرعة ع أساس انه فيلم الرعب الأول في هداك الوقت.. كان مرعب اكتر من سلسلة فيلم SAW!!! كنا نموت خوف منه لدرجه انه كنا كل م نروح ع بيت تيتا و نعزبها تيجي خالتي الشريره تهددنا انها رح تشغل أمنا الغوله و تجبرنا نحضره ،، طبعا لمجرد انها تقلنا هيك فورا نحترم حالنا و نقعد مكتفين …هلأ ((امنا الغوله )) كانت عباره عن شخصيه ب بفيلم و صوروه و لما خلصوا التصوير الممثله اخدت مقابل للدور و راحت لتصور مشهد تاني بفيلم تاني عامله فيه دور الفلاحه البسيطه!!! يعني هي مو غوله عنجد!!!… مو هون المشكله .. المشكله انه هي كانت عم تجسد صوره لشخصيه حقيقيه موجوده ع أرض الواقع وللأسف كتير ناس حلفو انهم شافوا الغوله بعدة أماكن وللأسف في بعض المدارس!! الغريب انه الغوله المفروض تظهر بالليل و بالأماكن المهجوره والمقابر !! لكن حديثا من كم يوم إكتشفوا العلماء إنه هادا النوع من الوحوش المرعبه تتطورت جيناتها و خصائصها و نزل منها موديلات 2015/2016 …و لا زالت طور التحديث!!! هاي الغوله بتتنقل بينا عادي و بتحكي متلنا و للأسف عامله تجميل لدرجة انها تبدو بشريه من الخارج !!! هلأ هادا الخبر صحيح و ما حدا يقلي شو قصدك!!! ما تفكروا قصدي إنه بعض المعلمات هيك !!! لأ ما تفهموني غلط!! انا ما قصدي إنو في كتير معلمات عامله رعب لطالباتها و نازله فيهم تعنيف نفسي وأغلب الأوقات ضرره اشد من التعذيب الجسدي !!! لا لا مو قصدي ابدا !!! ولا إنه في معلمات ليل نهار بتتذمر من طلابها و بتعاملهم كإنه بينها وبينهم تار !!! هلأ صح هي بتيجي عالدوام كل يوم قرفانه ومو عاجبها لا طلاب و لا مدرسه ولا منهج ولا راتب ولا برد ولا حر!! طبعا مع كل هادا لا يمكن يكون قصدي عليها!!! ولا قصدي إنه في معلمات بترعب طفله بنظره و بتكسف وردة صغيره و بدل م تشمها وتسقيها بتدعس عليها!! ولا قصدي إنه في كتير معلمات بتقلك أنا بشتغل تسلايه أصلا مو محتاجه الراتب !!! مو قصدي إنها بتتسلى و بتحطم نفسيات و عقليات 25 طالبه يوميا!!! ولا يمكن يكون قصدي إنه في كتير منهم قلبها بنقز و بتخاف لما تحكيلها الله يبعت لولادك معلمات متلك!!! اوعكم تفكروا انه قصدي عليها!!! لا انا شو إلي علاقه هي حره تدمرهم، تعنفهم ، أو تنسى انه كتير منهم بحاجة لمسة حنان أونظرة أمان !!! هي حرة أنا ما بحب اتدخل بهيك قصص!!! شو إلي علاقه بمعلمه تتمسخر ع طالب من طلابها قدام اصحابه!!! أو معلمه تمييز بين طلابها و تعاملهم ع حسب جنسياتهم!!! حرة هي!!! كانوا دايما يقولوا الظالم ما بيقدر ينام لا ليل ولا نهار!!! لا هيها ما بتلحق تحط راسها ع مخدتها إلا وهي مخموده ونايمه !!! عنجد جيناتهم متطوره .. اخر موديل و في منهم بحكو لغات.. وإلهم إخوه و خوات .. zombies و هيكا!!! إذهبي أيتها الروح الشريره إذهبي..
#رسول العلم_شكرا

بقلمي : سلام الزرو- قطر

شاهد أيضاً

الاستثمار، الرهان الخاسر!

جميعنا اصبح يعي و يدرك أن تحقيق نسب نمو وخلق فرص عمل وتحريك الدورة الاقتصادية …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *